საქართველოში ამერიკის შეერთებული შტატების საელჩო უკრაინაში რუსეთის ომის წლისთავთან დაკავშირებით განცხადებას ავრცელებს.
როგორც აშშ-ის საელჩოს განცხადებაშია ნათქვამი, ვლადიმერ პუტინს იმედი ჰქონდა, რომ კიევს ერთ დღეში აიღებდა, თუმცა უკრაინა არნახული სიმამაცით ამ დრომდე იბრძვის.
"ძალაუფლების შენარჩუნების მიზნით მტრის ხატის შექმნა და მასთან ბრძოლა დიქტატორების შეუცვლელი სტრატეგიაა. ასევე არახალია, რომ დიქტატორები ერთმანეთის შეცდომებს იმეორებენ. პუტინი საკუთარ ხალხს ეუბნება, რომ მთელი ცივილიზებული სამყარო მათი მტერია, რომ მხოლოდ ის დგას ჭეშმარიტების გზაზე. პუტინის მტერია ფეხმძიმე ქალები, რომლებსაც სამშობიაროში ბომბავს, პატარა ბავშვები და მოხუცები, რომლებიც თავშესაფრებში ერთმანეთს სიმღერით ამხნევებენ და ადამიანები, რომლებიც ირჩევენ თავისუფლებას. ერთი წლის წინ პუტინი დარწმუნებული იყო, რომ კიევი ერთ დღეში დაეცემოდა, რომ მის ჯარს უკრაინელი ხალხი ყვავილებით შეეგებებოდა და დასავლეთი მის საქციელზე თვალს დახუჭავდა. მაგრამ კიევი დგას, უკრაინელი ხალხი არნახული სიმამაცით იბრძვის და დასავლეთი ისეთი ერთიანია, როგორც არასდროს. პუტინის მსგავსი დიქტატორები იმეორებენ შეცდომას, რადგან მათ ავიწყდებათ ის ჭეშმარიტება, რომელიც საუკუნეების წინ რუსთაველმა გენიალურად ჩამოაყალიბა: "ბოროტსა სძლია კეთილმან, არსება მისი გრძელია", - წერს საელჩო.
უკრაინაში რუსეთის მიერ ომის დაწყებიდან 1 წელი გავიდა. რუსეთის არაპროვოცირებულ ქმედებებს უკრაინაში ათასობით ადამიანი ემსხვერპლა, ხოლო 10 მილიონზე მეტი მშვიდობიანი მოქალაქე ლტოლვილად იქცა. გადანადგურებულია ათობით ქალაქი და სოფელი.
დახურვა